ჟიურის სპეციალური პრიზი - მანანა ბერიშვილი - კახეთი, თელავი

თექისა და ხალიჩაზე ქსოვის ოსტატი, ხელოვნების მასწავლებელი. აქტიურად ჰყავს მოსწავლეები ჩართული ტრადიციული რეწვის სხვადასხვა კონკურსებსა და გამოფენებში.

ჟიურის სპეციალური პრიზი - დარიკო ჩიხლაძე - თბილისი

ოქრომკედითა და ვერცხლმკედით ნაქარგობის ოსტატი. აკეთებს სამუზეუმო ექსპონატების ასლებს საქართველოს სხვადასხვა რეგიონიდან. ცოდნას გადასცემს მომავალ თაობებს. ოქრომკედის ნაქარგით ქმნის როგორც საეკლესიო, ისე საერო დანიშნულების ნივთებს.

III ადგილი - მანანა მჭედლიშვილი 

ტრადიციული ხევსურული „ნაჭრელას“ ხელით ქარგვის შენარჩუნების მიზნით, ტრადიციული მეთოდების დაცვით მისი თანამედროვე რეალობაში გამოყენება და პოპულარიზაცია: სამოსსა და აქსესუარებზე დატანა. აქვს ვებ-გვერდი და ფეისბუქ გვერდი, სადაც ყიდის თავის ნამუშევრებს. 

იკვლევს ოჯახებში შემორჩენილი ხევსურული ნაქარგების ძველ ნიმუშებს, ასრულებს მათ გრაფიკულ ნახაზებს მათი შემონახვისა და გადარჩენის მიზნით. 

ინიციატივა შეიტანა კულტ. მემკვიდრეობის სააგენტოში ხევსურული „ნაჭრელას“ ქარგვის ტრადიციის არამატერიალური კულტურული მემკვიდრეობის ობიექტთა ნუსხაში დამატების მოთხოვნით.

III ადგილი - ნანა აზიზიანი - თბილისი

ლითონის მხატვრული დამუშავების ოსტატი, ოჯახის სხვადასხვა თაობის ტრადიციული ხელობის გამგრძელებელი. ქმნის ცნობილი სამუზეუმო ექსპონატების ასლებს და მოძრავი მუზეუმის კონცეფციით, დაატარებს როგორც თბილისის, ისე რეგიონის სკოლებში, რითაც პოპულარიზაციას უწევს ქართულ არქეოლოგიურ მემკვიდრეობას.

III ადგილი - მამუკა ხოშტარია - თბილისი

ხის ტრადიციული დამუშავების ოსტატი და დარგის აქტიური გულშემატკივარი. თავადაც აწარმოებს ხის ეკოლოგიურ პროდუქტს - ქვევრის ფორმის თხილის და კაკლის სატეხს - რომელიც ეძღვნება ქართულ ქვევრს. ნაკეთობებისთვის იყენებს შეშას, წარმოების ნარჩენებს და მდინარის მიერ მოტანილ ხეებს. სურს, თავისი 40 წლიანი გამოცდილება ამ დარგში გაუზიაროს მომავალ თაობასაც.

 II ადგილი - ნინო ბახუტაშვილი - დედოფლისწყარო, კახეთი

ტრადიციული მეფარდაგეობის მკვლევარი. სიღრმისეული კვლევის ფარგლებში მოიძია ნიმუშები და აღადგინა თუშური, აჭარული, ფშაური და სამცხე-ჯავახეთის ფარგადები. 2006 წელს დედოფლისწყაროში დაარსა სახელოსნო "ფესვები," რომლის მისიაა ქართული ფარდაგის ქსოვისა და ბუნებრივი საღებავებით ღებვის ტექნოლოგიის აღდგენა. სახელოსნო თავის საქმიანობას პოპულარიზაციას უწევს როგორც საქართველოში, ისე -  საზღვრებს გარეთაც. ქმნის ტურისტულ პროდუქტებს. 

აპირებს, იყალთოს აკადემიასთან ახალი სახელოსნო შექმნას. სახელოსნოში შემუშავდება ამ რეგიონისთვის დამახასიათებელი კოლექცია, რომლის შემოქმედებითად გათანამედროვება  მნიშვნელოვან წვლილს შეიტანს სახელოსნოსა და ამ რეგიონის განვითარებაში.

I ადგილი - ერმინე მაღრაძე - შიდა ქართლი, გორი

გამორჩეული, დამსახურებული მეცნიერი და ტიხრული მინანქრის ოსტატია. 1975 წელს ქალაქ გორში დააარსა ქართული ოქრომჭედლობის კვლევითი ლაბორატორია და სკოლა, რომელიც წლების მანძილზე სრულიად უსასყიდლოდ ამზადებს ნებისმიერი ზრდასრული ასაკის მქონე მსურველებს. ამ სკოლის ძირითადი მიზანი არის უძველესი ქართული ოქრომჭედლობის ტრადიციების კვლევა, აღდგენა და ახალი ტექნოლოგიების შექმნა, რაც ხელს შეუწყობს ქართული საოქრომჭედლო ხელოვნების მომავალ განვითარებას.